കഴിഞ്ഞ വര്‍ഷം കോഴിക്കോട്‌ വെസ്റ്റ്‌ഹില്‍ മൈതാനത്ത്‌ സ്വാതന്ത്ര്യ ദിന പരേഡ്‌ കാണാനെത്തിയ എ പ്രദീപ്‌ കുമാര്‍ എം എല്‍ എ പുവര്‍ ഹോമില്‍ കഴിയുന്ന ലോക ഫുട്‌ബോള്‍ താരം ജോര്‍ജ്‌ തോമസിനെ സന്ദര്‍ശിക്കുകയുണ്ടായി. അതിനു ശേഷം എം എല്‍ എ മുഖ്യ മന്ത്രിക്കയച്ച കത്ത്‌ പത്രകുറിപ്പായി ലഭിച്ചതാണ്‌ ജോര്‍ജിനെ പോയി കാണാന്‍ എന്നെ പ്രേരിപ്പിച്ചത്‌. ജോര്‍ജിനെ കണ്ടു മടങ്ങുമ്പോള്‍ അവസാനമായി പറഞ്ഞത്‌ തന്നെ കുറിച്ച്‌ എഴുതി വന്ന പത്രം കാണിച്ചു കൊടുക്കണമെന്നായിരുന്നു. സമ്മതം പറഞ്ഞു കൊണ്ടാണ്‌ അവിടെ നിന്നിരങ്ങിയത്‌. ഒടുവില്‍ ചിലരുടെ മുന്നില്‍ പ്രസിദ്ധീകരിക്കാന്‍ കഴിയാതെ പോയത്‌ ഇന്ന്‌ ഇവിടെ പ്രസിദ്ധീകരിക്കുന്നു. അത്‌ കാണാന്‍ ജോര്‍ജ്‌ തോമസ്‌ ഇല്ലെന്ന കാര്യം ഓര്‍മ്മിച്ചുകൊണ്ട്‌.
കാല്‍പ്പന്തിന്റെ നൊമ്പരങ്ങള്‍ക്കിടയില്‍ വിവാഹം പോലും മറന്നു പോയ ജോര്‍ജ്‌ ഓര്‍മ്മകളുടെ കളിക്കളത്തില്‍ ഇപ്പോള്‍ തനിച്ചാണ്‌. ഓര്‍മ്മകള്‍ മാഞ്ഞു തുടങ്ങിയെങ്കിലും ജോര്‍ജ്‌ തോമസിനു ചുറ്റും കളിക്കളത്തിന്റെ നിലയ്‌ക്കാത്ത ആരവവും ഗോള്‍ വല കുലുക്കിയതിന്റെ കാഴ്‌ചകളും ഇന്നും മായാതെ നില്‍ക്കുന്നു.കാല്‍പ്പന്ത്‌ കളിയില്‍ മാസ്‌മരികത സൃഷ്‌ടിച്ച്‌ ഒരു കാലഘട്ടത്തില്‍ അന്താരാഷ്ട്ര തലത്തില്‍ തിളങ്ങി നിന്ന ജോര്‍ജ്‌ തോമസ്‌ ഇപ്പോള്‍ വെസ്റ്റ്‌ഹില്ലിലെ പുവര്‍ ഹോമിലെ നാലു ചുമരുകള്‍ക്കിടയില്‍ ആരോടെല്ലാമുള്ള പരിഭവങ്ങള്‍ ഉള്ളിലൊതുക്കി പഴയകാല പ്രതാപവും പറഞ്ഞ്‌ സായൂജ്യമടയുന്നു.
1918 ഏപ്രില്‍ 13ന്‌ തിയോഡര്‍ തോമസിന്റെയും സലോമ ആഴുവങ്കയുടെയും മകനായി ജനനം. കോഴിക്കോട്‌ കോട്ടപ്പറമ്പ്‌ സ്വദേശിയാണ്‌ ജോര്‍ജ്‌. ബന്ധുവെന്ന്‌ പറയാന്‍ ആകെയുണ്ടായിരുന്നത്‌ ബി ഇ എം ഗേള്‍സ്‌ സ്‌കൂളില്‍ അധ്യാപികയായി ജോലി ചെയ്‌തിരുന്ന സഹോദരി കെര്‍ലിന്‍ തോമസ്‌ മാത്രം. സഹോദരിയുടെ മരണത്തോടു കൂടി തികച്ചും അനാഥന്‍.
കോയമ്പത്തൂരില്‍ ടെക്‌നീഷ്യനായിരിക്കെയാണ്‌ ജോര്‍ജ്‌ മിലിട്ടറിയില്‍ ചേരുന്നത്‌. രണ്ടാം ലോക മഹായുദ്ധകാലത്ത്‌ ബ്രിട്ടീഷ്‌ ആര്‍മിയില്‍ അംഗമായിരുന്ന ജോര്‍ജിന്‌ വിരമിക്കുന്നതു വരെ യുദ്ധത്തില്‍ പങ്കെടുക്കേണ്ടി വന്നിട്ടില്ല. കളി മാത്രമായിരുന്നു ജീവിതവും ലക്ഷ്യവും. ഈ ജീവിതത്തിനിടയ്‌ക്ക്‌ ഏറ്റവും സന്തോഷമുണ്ടാക്കിയതെന്താണെന്ന്‌ ചോദിച്ചാല്‍ ജോര്‍ജിന്‌ ഉത്തരം പറയാന്‍ തീരെ ആലോചിക്കോണ്ടതില്ല. 1946ല്‍ പഞ്ചാബിലെ സിയാല്‍ക്കോട്ടില്‍ നടന്ന ലോക ഫുട്‌ബോള്‍ ടൂര്‍ണമെന്റില്‍ ക്വാട്ടര്‍ ഫൈനലില്‍ സ്‌പെയിനിനെതിരെ രണ്ടു ഗോളുകളും സെമി ഫൈനലില്‍ ഇറ്റലിക്കെതിരെ രണ്ടു ഗോളുകളും നേടി ഫൈനലില്‍ പ്രവേശിക്കുകയും അമേരിക്കയെ ഒരു ഗോളിന്‌ പരാജയപ്പെടുത്തി ട്രോഫി കരസ്ഥമാക്കുകയും ചെയ്‌തതാണെന്ന്‌ പറയുമ്പോള്‍ വാര്‍ദ്ധക്യത്തിലും യുവത്വത്തിന്റെ പ്രസരിപ്പാണ്‌ ആ മുഖത്ത്‌.
ഇന്ത്യാ വിഭജനത്തിനു ശേഷം നാട്ടിലെത്തുമ്പോള്‍ കളിയെ പാടെ ഉപേക്ഷിക്കാന്‍ ജോര്‍ജ്‌ തയ്യാറായിരുന്നില്ല. മലബാര്‍ ഫുട്‌ബോള്‍ ലീഗിലും യൂണിവേഴ്‌സല്‍ ക്ലബിലുമായി വീണ്ടും തുടക്കം. ഇന്ത്യയിലെ തന്നെ ഏറ്റവും മികച്ച ക്ലബുകളിലൊന്നായിരുന്ന അഹമ്മദാബാദിലെ കേരള സ്‌പോട്‌സ്‌ ക്ലബിലും അഹമ്മദാബാദ്‌ ന്യൂ ഷറാക്ക്‌ മില്‍സിനു വേണ്ടിയും ജോര്‍ജ്‌ ജഴ്‌സിയണിഞ്ഞു. ഗുജറാത്തിനെ പ്രതിനിധീകരിച്ച്‌ സന്തോഷ്‌ ട്രോഫി, റോവേഴ്‌സ്‌ കപ്പ്‌, ഡ്യൂറാന്റ്‌ കപ്പ്‌ ടൂര്‍ണമെന്റുകളിലും കളിച്ചു. 1952ല്‍ ഗുജറാത്ത്‌ കമ്പൈന്‍ഡ്‌ ടീമിനു വേണ്ടിയുള്ള മത്സരത്തില്‍ മികച്ച ഫോര്‍വേഡറായിരുന്നു ജോര്‍ജ്‌ തോമസ്‌. പിന്നീട്‌ യെങ്‌ മെന്‍സ്‌, മെഹബൂബ്‌, യങ്‌ ചലഞ്ചേഴ്‌സ്‌ എന്നീ ടീമുകള്‍ക്കു വേണ്ടിയും ജോര്‍ജ്‌ ജഴ്‌സിയണിഞ്ഞു. കോഴിക്കോട്‌ മാനാഞ്ചിറ മൈതാനത്ത്‌ കളിച്ചതിന്റെ ഓര്‍മ്മകള്‍ ജോര്‍ജിന്റെ മനസ്സില്‍ ഇപ്പോഴും മായാതെ കിടപ്പുണ്ട്‌.
പന്തു കളിയോട്‌ വിട പറഞ്ഞുകൊണ്ടാണ്‌ ജോര്‍ജ്‌ സിനിമ ഓപ്പറേറ്ററുടെ മേലങ്കി എടുത്തണിഞ്ഞത്‌. ബേപ്പൂരിലെയും മാങ്കാവിലെയും പല തിയേറ്ററുകളിലും ഫിലീം ഓപ്പറേറ്ററായി ജീവിതത്തെ നേരിടാന്‍ ശ്രമിച്ചു. ബൂട്ടണിയാന്‍ സാധിക്കാത്ത കായിക താരത്തെ ആര്‍ക്കു വേണം എന്ന ജോര്‍ജിന്റെ ചോദ്യത്തിനു മുന്നില്‍ എനിക്ക്‌ ഉത്തരമുണ്ടായിരുന്നില്ല. വെസ്റ്റ്‌ഹില്ലിലെ പുവര്‍ ഹോമില്‍ എത്തുന്നതിനു മുമ്പ്‌ ചേവായൂരിലെ കരുണാഭവനിലെ അന്തേവാസിയായിരുന്നു ജോര്‍ജ്‌. കായിക പ്രേമികളും സംഘാടകരും മറന്നു പോയ ഈ കായികതാരത്തിന്‌ ഇനി ബൂട്ടണിയാന്‍ സാധിക്കില്ല. ഒരു കാലത്ത്‌ കളിക്കളത്തിന്റെ ആവേശമായിരുന്ന ഈ കായികതാരം മൂന്ന്‌ വര്‍ഷമായി അധികാരികളുടെ ദയ കാത്ത്‌ ഇവിടെ കഴിയുന്നു.
നൂറു ശതമാനം സാക്ഷരത കൈവരിച്ചവര്‍. രാഷ്‌ട്രീയ സാമൂഹിക ബോധമുള്ളവര്‍. പറഞ്ഞു വന്നത്‌ ദൈവത്തിന്റെ സ്വന്തം നാടായ കേരളത്തിലെ ജനങ്ങളെ കുറിച്ചാണ്‌.പറഞ്ഞതു മുഴുവന്‍ ശരിയാണ്‌. പക്ഷെ ബന്ദിന്റെയും ഹര്‍ത്താലിന്റെയും പേരിലുള്ള ദുരിതം പതിവായി തേടിയെത്തുന്നത്‌ ഈ നാട്ടിലാണ്‌. ഹര്‍ത്താലിന്റെ മുന്നില്‍ നിന്ന്‌ ഒഴിവാകാന്‍ മലയാളികള്‍ക്ക്‌ മുന്നില്‍ വഴികളില്ല. സഹനശക്തി മാത്രമാണ്‌ ഒരേയൊരു ആശ്രയം. ബന്ദും ബലപ്രയോഗത്തീലൂടെയുള്ള ഹര്‍ത്താലും ആദ്യമായി നിരോധിച്ച സംസ്ഥാനമാണ്‌ നമ്മുടേത്‌. ബന്ദ്‌ നിരോധിച്ചുകൊണ്ടുള്ള 1998 ജൂലൈ 28ന്റെ ഹൈക്കോടതി ഫുള്‍ ബെഞ്ച്‌ വിധി സുപ്രീം കോടതി അപ്പടി ശരിവെച്ചതാണ്‌. ബന്ദ്‌ നിയമ വിരുദ്ധമായി ഹൈക്കോടതി പ്രഖ്യാപിച്ചതോടെ അത്‌ പേര്‌ മാറ്റി `ഹര്‍ത്താല്‍' ആയി മാറി. അതിനുശേഷം നിര്‍ബന്ധിത ഹര്‍ത്താലിന്‌ ആഹ്വാനം ചെയ്യുന്ന രാഷ്‌ട്രീയ പാര്‍ട്ടികളുടെയും സംഘടനകളുടെയും രജിസ്‌ട്രേഷന്‍ റദ്ദാക്കുന്നതിന്‌ തിരഞ്ഞെടുപ്പ്‌ കമ്മീഷന്‌ അധികാരമുണ്ടെന്ന്‌ വരെ ഹൈക്കോടതി വിധിച്ചു.ഹര്‍ത്താലും ബന്ദും സംഘടിപ്പിക്കുവാന്‍ നേതാക്കള്‍ പരസ്‌പരം മത്സരിക്കുകയാണ്‌. അതല്ലെങ്കില്‍ രാഷ്‌ട്രീയ മത്സരം അതിന്‌ അവരെ നിര്‍ബന്ധിതരാക്കുന്നു. ഒരിറ്റു വിയര്‍പ്പൊഴുക്കാതെ ഏത്‌ ഈര്‍ക്കില്‍ പാര്‍ട്ടിക്കും ഒരു പത്രകുറിപ്പിലൂടെ എടുത്തു പ്രയോഗിക്കാന്‍ പറ്റുന്ന ആയുധമായി ഹര്‍ത്താല്‍ മാറിയിരിക്കുന്നു. നാലംഗങ്ങളുള്ള പാര്‍ട്ടിവരെ ഹര്‍ത്താല്‍ നടത്തുന്ന സംസ്ഥാനമാണിത്‌. കഴിഞ്ഞ വര്‍ഷം ഒക്‌ടോബര്‍ അവസാന വാരം ലീഗ്‌ നടത്തിയ മലബാര്‍ ഹര്‍ത്താല്‍ തന്നെ ഉദാഹരണം. സാധാരണ യു ഡി എഫ്‌ പ്രഖ്യാപിക്കുന്ന ഹര്‍ത്താലിന്‌ പിന്തുണ പ്രഖ്യാപിച്ചിരുന്ന ലീഗും ഇതോടെ തലപൊക്കി തുടങ്ങിയിരിക്കുകയാണ്‌. ഇതിന്‌ പിന്നില്‍ വ്യക്താമായ രാഷ്‌ട്രീയ ലക്ഷ്യമുണ്ട്‌. കോയമ്പത്തൂരില്‍ നിന്ന്‌ ജയില്‍ വാസം കഴിഞ്ഞിറങ്ങിയവന്‌ മലപ്പുറത്തേക്ക്‌ ഒരു നോട്ടമുണ്ടെന്ന കാര്യം തങ്ങള്‍ക്ക്‌ മനസ്സിലായില്ലെങ്കിലും കുഞ്ഞാലിക്കുട്ടിക്കെങ്കിലും മനസ്സിലായി കാണണം. ലീഗിന്റെ ശക്തി ഒന്നു തെളിയിക്കേണ്ടത്‌ അത്യാവശ്യമാണ്‌. സ്വന്തമായി ആദ്യം ഒരു ഹര്‍ത്താല്‍ നടത്തുന്നുണ്ടെങ്കില്‍ അതിന്റെ വിഷയത്തെകുറിച്ച്‌ ആലോചിക്കേണ്ട ആവശ്യമില്ല. പ്രവാസികളാണ്‌ നമ്മുടെ ശക്തി. വിമാന താവളം നമ്മുടെ വിഷയം.അതിനുശേഷം കൃത്യമായി പറഞ്ഞാല്‍ അഞ്ചാം ദിവസം മറ്റൊരു ഹര്‍ത്താലിന്‌ കൂടി കേരളം സാക്ഷിയായി. നിയമ സഭയിലേക്ക്‌ ഒരംഗത്തെപ്പോലും തിരഞ്ഞെടുത്തയക്കാന്‍ ജനപിന്തുണ നേടാന്‍ സാധിക്കാത്ത ബി ജെ പിയാണ്‌ അതിന്റെ ഉപജ്ഞാതാക്കള്‍. ട്രയിന്‍ ഏതായാലും പോയി എന്നാല്‍ ഇനി റോഡു കൂടി അടച്ചേക്കാം എന്ന്‌ ബി ജെ പി ചിന്തിച്ചതില്‍ എന്താണ്‌ തെറ്റ്‌? ഹര്‍ത്താല്‍ നടത്താനുള്ള വിഷയം കിട്ടാതെ ഒരു പാര്‍ട്ടിയും കേരളത്തില്‍ ഇതുവരെ ബുദ്ധിമുട്ടിയിട്ടില്ല. മുല്ലപ്പെരിയാര്‍, എ ഡി ബി, മാലിന്യ പ്രശ്‌നം, ദുരന്തങ്ങള്‍ തുടങ്ങിയവയൊക്കെ കേരളത്തില്‍ ഹര്‍ത്താലിന്‌ വിഷയങ്ങളാണ്‌. ഇതിനെല്ലാം പുറമെ ഗവ.ലോ കോളേജില്‍ നടന്ന പതിവു വിദ്യാര്‍ത്ഥി സംഘട്ടനവും ഹര്‍ത്താലിന്‌ വിഷയമാക്കി തീര്‍ത്തത്‌ ഇപ്പോഴത്തെ പ്രതിപക്ഷ മുന്നണിയാണ്‌. അവര്‍ തന്നെയാണ്‌ ഈ വര്‍ഷത്തെ ആദ്യ സംസ്ഥാന തലത്തിലുള്ള ഹര്‍ത്താലിന്‌ നേതൃത്വം കൊടുക്കുന്നത്‌. വിഷയമാകട്ടെ സാധാരണക്കാരായ പൊതു ജനങ്ങളെ ബാധിക്കുന്ന വിലക്കയറ്റവും. എന്നാല്‍ ഹര്‍ത്താല്‍ നടത്തി ആവശ്യം നേടിയെടുത്ത സംഭവം ആര്‍ക്കുമറിയില്ല. ഗാന്ധിജിയുടെ കാലം തൊട്ടുള്ള അക്രമരഹിത പ്രതിഷേധ മാര്‍ഗമാണിതെന്നാണ്‌ കോണ്‍ഗ്രസിന്റെ നിലപാട്‌. ഹര്‍ത്താലിന്റെ ആശാന്മാര്‍ ഇപ്പോള്‍ ഭരണത്തിലായതുകൊണ്ട്‌ അഞ്ചു വര്‍ഷത്തേക്ക്‌ അവരുടെ ഹര്‍ത്താലാഹ്വാനങ്ങള്‍ക്ക്‌ കുറവുണ്ടാകുമെന്ന്‌ നമുക്ക്‌ പ്രതീക്ഷിക്കാം. സംസ്ഥാനം മുതല്‍ ജില്ല, താലൂക്ക്‌, മണ്‌ഡല തലം വരെ ഹര്‍ത്താലുകള്‍ കേരളീയ സമൂഹത്തിന്റെ ഭാഗമായി തീര്‍ന്നിരിക്കുന്നു. അക്രമം ഉണ്ടായേക്കുമോ എന്ന ഭയം കൊണ്ടു മാത്രമാണ്‌ ഹര്‍ത്താല്‍ ദിനത്തില്‍ ജനങ്ങള്‍ പുറത്തിറങ്ങാന്‍ മടിക്കുന്നത്‌. ആ ഭയത്തെ ചൂഷണം ചെയ്‌ത്‌ ഈര്‍ക്കിലി രാഷ്‌ട്രീയ പാര്‍ട്ടികള്‍ വരെ അവരുടെ വിജയം ആഘോഷിക്കുന്നു. ഹര്‍ത്താല്‍ വിരുദ്ധ സംഘടനകളുടെ കണക്കനുസരിച്ച്‌ പ്രാദേശിക തലം മുതല്‍ സംസ്ഥാന തലം വരെ ഇരുനൂറ്റി അമ്പതിലേറെ ഹര്‍ത്താലുകള്‍ കേരളത്തില്‍ നടക്കുന്നുണ്ട്‌. കഴിഞ്ഞ വര്‍ഷം മാത്രം 180ലേറെ ദിവസങ്ങളാണ്‌ ഹര്‍ത്താല്‍ കവര്‍ന്നെടുത്തത്‌. സംസ്ഥാനാടിസ്ഥാനത്തിലുള്ള ഒരു ഹര്‍ത്താലില്‍ നാലായിരം കോടി രൂപയുടെയെങ്കിലും നഷ്‌ടമുണ്ടാവുമെന്നാണ്‌ കണക്ക്‌. കഴിഞ്ഞ മലബാര്‍ ദിനത്തില്‍ അഞ്ചു കോടിയുടെ നഷ്‌ടമാണ്‌ കെ എസ്‌ ആര്‍ ടി സിക്കു മാത്രം ഉണ്ടായത്‌. സര്‍ക്കാര്‍ ഖജനാവില്‍ കോടികളുടെ നഷ്‌ടം വരുത്തിവെക്കുന്നതിനൊപ്പം സാധാരണ ജനങ്ങളുടെ ജീവിതം ദുരിതപൂരിതമാക്കിയാണ്‌ (ഹര്‍ത്താലിന്റെ മറവില്‍ വീട്ടില്‍ ചടഞ്ഞിരിക്കാന്‍ ആഗ്രഹിക്കുന്നവര്‍ക്ക്‌ ഒന്നും നഷ്‌ടപ്പെടാനില്ല) ഓരോ ഹര്‍ത്താലും കടന്നു പോകുന്നത്‌. വികസനത്തിന്റെ പാതയിലൂടെ മുന്നോട്ടു കുതിക്കാന്‍ കേരളം ഒരുങ്ങി നില്‍ക്കുന്ന കാലമാണെന്നോര്‍ക്കണം. മനുഷ്യാവകാശ ലംഘനങ്ങള്‍ നടന്നാല്‍ അത്‌ പൊതു സമൂഹത്തിന്റെ ശ്രദ്ധയില്‍ കൊണ്ടു വരേണ്ടവരാണ്‌ മാധ്യമങ്ങള്‍. ഹര്‍ത്താല്‍ പോലുള്ള സാമൂഹിക വിരുദ്ധ നിലപാടുകള്‍ക്ക്‌ പ്രചാരണം നല്‍കുന്നതില്‍ നിന്ന്‌ മാധ്യമങ്ങള്‍ പിന്തിരിയണം. അതോടൊപ്പം തന്നെ അതിനെതിരെ ശക്തമായ ഭാഷയില്‍ നിലപാടുകളെടുക്കാനും മാധ്യമങ്ങള്‍ തയ്യാറാകണം. ഹര്‍ത്താല്‍ ആഹ്വാനം ചെയ്യുന്ന രാഷ്‌ട്രീയ പാര്‍ട്ടികള്‍ക്കെതിരെ ജനങ്ങള്‍ സംഘടിതമായ രീതിയില്‍ തിരിയേണ്ട കാലം അതിക്രമിച്ചിരിക്കുന്നു. ഭയന്ന്‌ അതിന്‌ കീഴടങ്ങുന്ന ശീലം സമൂഹം ഉപേക്ഷിക്കണം.
Read More......
കഴിഞ്ഞ ലോകകപ്പ്‌ മത്സരത്തോടെ ഏകദിന കുപ്പായം അഴിച്ചുമാറ്റിയ സ്റ്റീഫന്‍ ഫ്‌ളെമിംഗ്‌ അന്താരാഷ്ട്ര ക്രിക്കറ്റ്‌ മത്സരങ്ങളോട്‌ തന്നെ വിട പറയുകയാണ്‌. മാര്‍ച്ച്‌ 22 ന്‌ നേപ്പിയറില്‍ ഇംഗ്ലണ്ടുമായി നടക്കുന്ന മൂന്നാമത്തേതും അവസാനത്തേതുമായ ടെസ്റ്റ് മത്സരത്തിലായിരിക്കും ഫ്‌ളെമിംഗ്‌ അവസാനമായി പാഡണിയുന്നത്‌. ന്യൂസിലാന്റ്‌ കണ്ട എക്കാലത്തെയും മികച്ച ക്യാപ്‌റ്റന്‍ കളിക്കളം വിടുന്നതോടുകൂടി മികച്ച താരത്തെയാണ്‌ ന്യൂസിലാന്റിന്‌ നഷ്‌ടമാകുന്നത്‌.1973 ഏപ്രില്‍ ഒന്നിന്‌ ന്യൂസിലന്റില്‍ ജനിച്ച സ്റ്റീഫന്‍ ഫ്‌ളെമിംഗിന്‌ ലോകം കണ്ട ക്രിക്കറ്ററായി മാറാന്‍ അധിക സംയമൊന്നും വേണ്ടിവന്നിട്ടില്ല. മികച്ച ബാറ്റ്‌സ്‌മാന്‍ എന്നതിലുപരിയായി ലേകം കണ്ട മികച്ച നായകന്മാരില്‍ ഒരാളായാണ്‌ ഫ്‌ളെമിംഗ്‌ തിളങ്ങിയത്‌. 1992 ജനുവരിയില്‍ ഹാമില്‍ട്ടണില്‍ കാന്‍ഡര്‍ബറിക്കു വേണ്ടി കളിച്ചതാണ്‌ ഫ്‌ളെമിംഗിന്റെ ആദ്യ മത്സരം. 1994ല്‍ നേപിയറില്‍ ഇന്ത്യയ്‌ക്കെതിരെ അന്താരാഷ്ട്ര മത്സരത്തില്‍ അരങ്ങേറ്റം കുറിച്ച ഫ്‌ളെമിംഗ്‌ ആ മത്സരത്തില്‍ 92 റണ്‍സ്‌ നേടി മാന്‍ ഓഫ്‌ ദ മാച്ച്‌ പദവിക്കര്‍ഹനായി. ആദ്യ മത്സരത്തില്‍ തന്നെ കളിയിലെ കേമനായികൊണ്ടാണ്‌ ഫ്‌ളെമിംഗ്‌ തന്റെ വരവറിയിച്ചത്‌. 1997 ഫെബ്രുവരിയില്‍ പരിക്കേറ്റ ലീ ജാമോനു പകരം ടെസ്റ്റ് ക്യാപ്‌റ്റനാകുമ്പോള്‍ ഫ്‌ളെമിംഗിന്‌ 24 തികഞ്ഞിരുന്നില്ല. ക്രിക്കറ്റിന്റെ ചരിത്രത്തില്‍ ഒരിക്കലും അര്‍ഹിക്കുന്ന പ്രാധാന്യം ലഭിക്കാതിരുന്ന ന്യൂസിലാന്റ്‌ ടീമിനെ വിജയ പാതയിലേക്ക്‌ നയിച്ചുകൊണ്ടാണ്‌ സ്റ്റീഫന്‍ ഫ്‌ളെമിംഗ്‌ ലോക ക്രിക്കറ്റ്‌ ഭൂപടത്തില്‍ ഇടം നേടിയെടുത്തത്‌.ഒരു പിടി നേട്ടങ്ങളുമായാണ്‌ ഫ്‌ളെമിംഗ്‌ അന്താരാഷ്ട്ര ക്രിക്കറ്റ്‌ മത്സരങ്ങളോട്‌ വിട പറയുന്നത്‌. 108 ടെസ്റ്റ് മത്സരങ്ങളില്‍ നിന്നായി 39.73 ശരാശരിയോടെ 6,875 റണ്‍സാണ്‌ ഫ്‌ളെമിംഗ്‌ അടിച്ചുകൂട്ടിയത്‌. 279 ഏകദിനങ്ങള്‍ കളിച്ച ഫ്‌ളെമിംഗ്‌ 32.41 ശരാശരിയോടെ 8,007 റണ്‍സാണ്‌ സമ്പാദിച്ചു കൂട്ടിയത്‌. ടെസ്റ്റില്‍ ഏറ്റവുമധികം റണ്‍സ്‌ സ്‌കോര്‍ ചെയ്‌ത ന്യുസിലന്റുകാരന്‍ എന്ന വിശേഷണം ഫ്‌ളെമിംഗിന്‌ അവകാശപ്പെട്ടതാണ്‌. ടെസ്റ്റില്‍ ഒമ്പത്‌ സെഞ്ച്വറികളും 43 അര്‍ധ സെഞ്ച്വറികളും സ്വന്തമാക്കിയ ഫ്‌ളെമിംഗ്‌ ഏകദിനത്തില്‍ എട്ട്‌ സെഞ്ച്വറികളും 49 അര്‍ധസെഞ്ച്വറികളും നേടിയിട്ടുണ്ട്‌. ന്യൂസിലന്റിനെ ഏറ്റവും കൂടുതല്‍ ടെസ്റ്റ് വിജയങ്ങളിലേക്ക്‌ നയിച്ച നായകന്‍ എന്ന സ്ഥാനം ഫ്‌ളെമിംഗിനര്‍ഹതപ്പെട്ടതാണ്‌. 80 ടെസ്റ്റുകളില്‍ ന്യൂസിലന്റിനെ നയിച്ച ഫ്‌ളെമിംഗ്‌ 28 എണ്ണത്തിലും വിജയം കണ്ടെത്തി. ന്യൂസിലന്റ്‌ ക്രിക്കറ്റ്‌ ചരിത്രത്തിലെ ഏറ്റവും പ്രായം കുറഞ്ഞ നായകനായ ഫ്‌ളെമിംഗ്‌ 218 മത്സരങ്ങളില്‍ നായകനായിരുന്നിട്ടുണ്ട്‌. ഇതോടെ ഒരു രാജ്യത്തെ ഏറ്റവും കൂടുതല്‍ ഏകദിനങ്ങളില്‍ നായകനാകുക എന്ന റെക്കോര്‍ഡ്‌ ഫ്‌ളെമിംഗ്‌ സ്വന്തം പേരില്‍ കുറിച്ചു. അര്‍ജുന രണതുംഗെയുടെ പേരിലുള്ള റെക്കോര്‍ഡാണ്‌ ഫ്‌ളെമിംഗ്‌ തിരുത്തിയത്‌. 2004 മാര്‍ച്ചില്‍ ഫ്‌ളെമിംഗിനെ ന്യൂസിലാന്റ്‌ ക്രിക്കറ്റര്‍ ഓഫ്‌ ദ ഇയര്‍ ആയി തെരഞ്ഞെടുത്തു. മാര്‍ട്ടിന്‍ ക്രോയെ മറികടന്ന്‌ ന്യൂസിലാന്റിനു വേണ്ടി ഏറ്റവും കൂടുതല്‍ ടെസ്റ്റ് കളിക്കുകയും ഏറ്റവും കൂടുതല്‍ റണ്‍സ്‌ നേടുകയും ചെയ്‌ത താരമെന്ന ഫ്‌ളെമിംഗ്‌ സ്വന്തമാക്കി.2006ല്‍ കേപ്‌ടൗണില്‍ ദക്ഷിണാഫ്രിക്കയുമായി നടന്ന രണ്ടാം ടെസ്റ്റ് മത്സരത്തില്‍ ഡബിള്‍ സെഞ്ച്വറി നേടുക വഴി ടെസ്‌ററ്‌ മത്സരങ്ങളില്‍ മൂന്നു തവണ ഡബിള്‍ സെഞ്ച്വറി നേടുന്ന ന്യൂസിലന്റ്‌ താരമെന്ന ബഹുമതിയും ഫ്‌ളെമിംഗിനെ തേടിയെത്തി. ഒന്നാം സ്‌ളിപ്പിലെ ഏറ്റവും മികച്ച ഫീല്‍ഡര്‍മാരിലൊരാളായ ഫ്‌ളെമിംഗ്‌ ഈ സ്ഥാനത്തുനിന്ന്‌ ഏറ്റവുമധികം ക്യാച്ചുകളെടുത്തവരുടെ പട്ടികയില്‍ രണ്ടാം സ്ഥാനത്താണ്‌. ഒരു ദശാബ്‌ദത്തിലധികം ന്യൂസിലന്റിനെ നയിച്ച ഫ്‌ളെമിംഗ്‌ സമീപകാല ക്രിക്കറ്റിലെ ഏറ്റവും ബുദ്ധിശാലിയായ നായകനായാണ്‌ വിലയിരുത്തപ്പെടുന്നത്‌. 200ലെ ചാമ്പ്യന്‍സ്‌ ട്രോഫിയില്‍ കിരീടത്തിലേക്കും 1999ലും 2007ലും ലോകകപ്പ്‌ സെമിയിലേക്കും ന്യൂസിലാന്റ്‌ മുന്നേറിയതും ഈ നായകന്റെ കീഴിലായിരുന്നു.പത്ത്‌ വര്‍ഷത്തോളം ടീമിനെ നയിച്ച ഫ്‌ളെമിംഗിന്റെ ക്യാപ്‌റ്റന്‍ സ്ഥാനം കഴിഞ്ഞ സെപ്‌തംബറിലാണ്‌ തെറിച്ചത്‌. അന്താരാഷ്ട്ര മത്സരത്തില്‍ നിന്ന്‌ വിരമിച്ചെങ്കിലും ഏപ്രിലില്‍ നടക്കുന്ന ഇന്തയന്‍ പ്രീമിയര്‍ ലീഗ്‌ ട്വന്റി-20 മത്സരത്തില്‍ ഫ്‌ളെമിംഗ്‌ കളിക്കുമെന്നാണ്‌ ക്രിക്കറ്റ്‌ പ്രേമികളുടെ വിശ്വാസം
Read More......
അന്തര്ദേശീയം
